Nochan is da Heilige Abend kemma. Des woa natürlich da Höhepunkt. Nochmittog homma ins miassn sche ohziachn und gonz brav sei. Und donn um drei umadum is zan Jausna gwen. Do homma a Kletzenbrot mit Butter und an Kaffee griag. Da Votta hod an Schnops herdo. Und a die Dienstboten woan olle mit dabei. Des woa donn richtig a gemeinsames Jausnen.
Und nochn Jausnen, wia oi satt woan, is zum Räuchern gonga. Do samma in Stoi gonga und ums gonze Haus herum. Überoi hods nochn Rauch grochn, Kranawentbee und Weihrauch uns so Zeig homma einido in die Gluat. Und do woa a Vorbeter, der hod in Rosenkronz bet. Und mia hom miassn nochbeten und die gonzen Kia, Goaß und Roß mitn Weichbrunnen bespritzen. Des woa domois a muats Erlebnis! Wia ma donn wieda zruck in die Stuben kemma san, is wieder des gonze Gesinde zomkemma. Und do homma noand numoi drei Rosenkronz bet und danoch hod da Votta nu de Heiligenliternei bet. Woa ois sche und recht oba ins is des noand scho zlong woan! Homma oiwei scho gwoat, wonn endlich des Christkindl kimmt und endlich des beten goa wa!
Da söbst ghockte Christbam woa oben im Eltern-Schlofzimmer. Und bevor die Glocken nid gleit hod, homma nid auffi deaffn. Donn waos endlich soweit, de gonze Familie und es Hauspersonal is auffi und noand homma obn a Weihnochtsliad gsunga. Jeder wiara hoid kina hod. A boa bissei foisch oba des is e wuascht gwen. Und nochan san die Geschenke vateilt woan. Kekse, Lebkuchen, Schokolade. Jeder hod a Packerl griag und nu Kloanigkeiten, wia Handschuach oda gstrickte Socken, wos de Frauen so gstrickt hom - ois gonz bescheiden hoid.
Nochher, boi des ummagwen is, samma wieda owi gong in die Stuben und hom Obndgessn. Do hods noand Weinbeernudeln gem – Wuchteln aus feinem Weizenmehl. Des woa oafoch a Delikatesse. Do homma ins foigschlong! Do woas e scho so 10i umadum. Und donn hotst ghoassn „Ab zur Mitternachtsmesse!“.
Gegen 11i ummi, hod da Votta noand, boi Schnee gwen is, des Roß eigsponnt. De oan san auf de Kuven drauf gstondn, de oan gsessn und die Dienstboten san zfuaß gonga. Do samma noand oi zur Heiligen Messe gfoahn. De Roß homma untn eigstöht in Stoi und mia san auffi gong zur Kirch. Do host de Turmbläser scho von der weiten gheat – „Stille Nacht“ und „Ihr Kinderlein kommet“ homms gspiet. Und soo fü Leit woan, dass die Kirch so foi gstopft woa, dass de Leit zum Umfoin koan Plotz mehr ghobt hom! Und endlich, wia noand de Messe vorbei woa (ins hods e fü zu long dauert) homma wieder hoamfoahn kunnt. Dahoam woa die „Metten-Garmerin“. Des woa a Frau die dahoam bleim und aufs Haus aufpassen miassn hod, dass nix brennat wiad. Und die hod miassn a Mettsuppen kochen, die mia noand nu gessen hom.
Des woa da Weihnochtstog domois in meina Kindheit.
Diesen Artikel kommentieren